O Drabarimós

From Kaskosan

Sas pe kay nas pe, sas kadó de domúlt, p’e vryámya kána le pishomá bashavénas e lávuta. Néshte Rrom anzardinésas pénge tséri avriál ánda ek fóro, ay sa zhánas le Rromniá kothé te drabarén le gazhán ay le Rrom zhánas te lasharén kakávia, íshturia, kolá.

De diminiátsi ek Rromní phurí gelí and’o fóro ay zumavélas te drabarél eká gazhá kay chachés, chi pachálas pe but chi and’o drabarimós chi ánde late, sar kay sas mashkár savorrénde pe ko¬dyá vryámya, sar drabarélas la, nakhlí ángla lénde ek gazhí, kána e Rromní dikhlá la, ánda yekh alyardá ay da p’o gor ke kachá gazhí vurritsílas la kavriá kay voy drabarélas, ay phendá les láke, ay vórta kachá gazhí kay nakhlí ángla lénde beshélas duy vay trin kherá may inchá, kána e gazhí kay e Rromní drabarélas ashundá kodyá, mulí, ay phendá:

–Katár zhanés tu kodyá ke me sim láke vurríto, Rromnío? –No, abá phendém túke so si o drabarimós. De véselo ay de lashí kay sas e gazhí da la Rromniá chirál, shónko, manrró, cháyo, kolá ay manglá katár e Rromní te ambóldel pálpale tehára, ay te kerél láke kak manogála, fármeko lashó, na nasúl, káste te na may vurritsíl la e káver gazhí.

E phurí Rromní la pésko mandjín ay amboldá ka’l tséri. Pe teharín sar ambóldelas e phurí Rromní ánd’o fóro, o chéri bun¬tuisáylo ay la-pe te del byrshínd zuralés, yuy, so te kerél?, nashtí ambóldelas pálpale ka’l tseri, ánd’o durimós dikhlá ek bordáy ay geló inchá ay da andré, kothé sas deshudúy manúsh, mursh terné and’o kostúmo, stadjiása ay shoréntsa, kay beshénas de búshule kruglóm e yag, no, mirisáyli e Rromní ay da len ches:

–May drobóy tu, manushále!, phénke.

–May naís, Rromnío!, so avilán kathé?

–No, manushále, baró byrshínd del avrí, núma si mishtó kodyá pála o shon kay sam, ay p’o yivénd.

–Ay túke drágo kakó shon, “agosto”1?

–Ay sar te na?, ay vi pala kakó avel o septémbro, kay vi anel pésa e primovára, ay ángla kakó vi sas o “julio”2, vórta kána astarél o yivénd kay vi si les pésko shukarimós, ay púrme avén o miláy ay e támna, no, sa le shon si mánge drágo.

–No, Rromnío, áke, si amén ek podárka túke, le kakó gonó ay na putér les zhikáy chi aresésa ka chi tséra. Ay so diné la sas ek gonó baró ay pharó, phérdo gálbi. Pe teharín ay kána geló ánd’o fóro phendá péska gazháke kay drabarélas, ke deshudúy manúsh pe kutári ay kutári rig dinésas la gálbi, ay chi phendá chi avér khánchi. Zhikín délas dúma vi e kola¬vér gazhí e vurrichóso ashunélas, ay pála kodyá, gelítar prastandóy pe’l kímpuria te dikhél le deshudón.

–May drobóy tu, Manushále.

–May Naís!, so anél tu kathé?

–O klima.

–Ay sar si akaná?, pushél yekh ánda lénde.

–Vurríto sar sagdá, phendá e gazhí.

–So, nay túke drago o oxtóto shon?

–Katár?, phenél e gazhí, baró shil si ay vi del byrshínd.

–Ay o septémbro?

–Ínke may xantsí, e primovára ay le luludjá den ma alerzhía.

–Ay le shon le miláske?

–Ix, merés tachimástar.

–Ay che gýndo si tu pa’l shon la tamnáke?

–Ínke may nasul le, ke perén le patriá pa’l kash ay vi si shil.

–No, gazhío, si amén ek podárka túke. Le yakhá la gazháke strefiánas.

–Le kadó pharó gonó ay putér les kheré.

Ay e gazhí ánde pésko kamlimós pe´l lové gelitar kothar fug fugátar, bi te del djes lashó kanikás pálpale. Kána areslí kheré ay puterdá kodó gonó, zhanén so anklistó avrí kothar? Shelá ay shelá sapá kay xalé pénge sa ay kay vi xalé pénge la Gazhá.

El deshudúy mursh kukolá katár o bordáy kay dénas podárka le goné, sas le shon le borshéske. Ay e Rromní bi te zhanél kerdá pésko mishtimós vi lénge vi la gazháke kay drabarélas, ay le gazhé liné-pe d’atunchára te pachán-pe may but ánd’el Rromniá ay and’o drabarimós.

Kadyá sas murrí paramíchi, ma nay ánda láte.